Monday, October 6, 2008

Cerita Teman Kantor - Si Jati Anak Betawi

Si Jati Anak Betawi
Cibinong. 07/10/2008

Namenye sih keren, M. Darajati Imanullah, tapi dipanggilnye cukup ‘Jati’. Ade kagak ye orang Betawi namanye Jati, rasenye nggak ade tuh. Tapi kalo’ cume ngaku-ngaku aje sih kagak ape-ape. Biar keren tuh, kayak bintang pelem, Rano Karno, katanye. Iye, kalo’ kayak Bang Rano, nyang sekarang jadi wakil gubernur Banten, Nah kalo’ malah mirip Mandra atau Bolot, kan juga bintang film. Gimana ? Berabe kagak tuh ! Tapi sih, nggak ape-ape Jat, tenang aje, ada abang di mari, banyak kok orang mane-mane yang ujug-ujug ngaku orang Betawi. Mungkin karena terpakse kali ye ? Buat gaya-gayaan atau buat lucu-lucuan, terserahlah. Ane sendiri yang orang Betawi kagak ambil pusing. Temen sekolah ane dulu, namenye Ahmad Supiyanto, dari namenye aje udah ‘Njawani’. Tapi kalo’ dikatain ‘Jawa’ marah banget. Bagimane nggak, lah doi lahir ame gedenye di daerah Warung Buncit. Malahan kalo’ ngomong lebih Betawian nih kawan daripade kite. Tapi kan ente ngaku orang Betawi biar selamet. Ingat kagak kejadiannye. Parung, Golok, Ayam Bangkok.... nah... kan!.
Jat, kalo’ ente seneng di Jakarte, dengerin nih nasehat abang. Pertame, ente harus hormatin tuh agame orang Betawi, Islam. Jangan pas ada pengajian atawa maulid ente gonjrang gonjreng maen gitar, mending suare ente bagus, nah kalo’ kayak kareng rombeng. Bisa berabe ente. Di Jakarte, anak-anak mude asli Betawi yang badanye tato’an tiap malem nyekek botol, tapi kalo’ ente singgung agamanye bise-bise dia tereak jihad. Udah paling depan die bawa golok. Padahal ngaji juz amma juga belom khatam. Kedue, ente juga harus hormat ame orang yang lebih tua, misalnye engkong, nyak, babe; encing, encang, semuanye deh, pokoknye yang umurnye lebih tua dari kite. Jangan diselak omongannye, biasenye orang-orang tua di Betawi paling pantang di selak ame anak mude. Kalo’ ente udah bise ngambil ati orang-orang tua nye, nah yang cere-cere pade ngikutin dah. Ibarat kate, pentolannye udah ente pegang, tinggal tuh buntut pade ngikutin.
Kalo’ due-duenye udah ente pake’ tambahin deh ente sopan sama anak-anak, ibu-ibu, terus negor dah kalo’ mau liwat. Nah, ane jamin ente selamet dah hidup di Jakarte. Nggak ada yang ngotak-ngatik. Tapi, kalo’ masih ade juga yang ngotak-ngatik ente, tinggal bilang aje sama abang lu, nih !.
[Nasehat buat kawan baik saya Jati]

5 comments:

darajati said...

Ngaco aja lu Bon, kapan Gw genjreng gitar waktu ada orang ngaji, kan Gw gak bisa maen gitar.
Yang bener karaokean, itu juga bareng ama Lu kan?, waktu hari sabtu pagi, ujung2nye gak jadi kuliah kite
Tul gak?

darajati said...

Bon, inget gak Lu dulu berandai-andai, " Jat, kapan2 kite makan di warung sambil duduk besile di suatu kampung, sambil ngupi and nyamsu "
Kalo gitu tanah Lu yg di jonggol , Lu bikin warung aja Bon, ntar kite mampir and nongkrong disitu ok?

darajati said...

Hhmmm waktu begitu cepat berlalu ya Bon....

Gw inget dulu ngajarin and ngenalin Sasa warna-warna,ngasih kado bantal boneka macan, gak kerasa skrg anak Lu dah gede ya....

Kadang gw kangen suasana 11 tahun yg lampau, jaman kite masih du'afa and ngekos di Haji Toing, penuh keterbatasan (khususnya ekonomi neehhh) tapi begitu kompak, penuh canda dan tawa ( kalo tanggal tua, mulut tertawa, kantong menempis and batin menjerit, he he he)

Kapan kumpul2 lagi ya...?

Bond said...

Hehe... Jati, muncul juga die...
Kalo' inget jaman susah dulu emang kagak abis seharian diceritain. Ngomong-ngomong ente mau ngajak ane makan nasi uduk semur jengkol. Kapan nih....

darajati said...

he3x kemaren2 komputernye nge heng bond (wkwkwk inget jaman dulu, gotong2 pc ketempat lu)

gw lagi konsen ke rik lb dulu nih numpuk mo jt.tempo, ntar kalo dah rampung gw ajak lu makan ke warung betawi paling enak di depok ... gw ngajak tapi lu yg bayar ye... he3x

National Geographic POD